Denuncian o desprezo da dirección por mellorar as condicións da plantilla, con incumprimentos constantes no plan de igualdade ou no teletraballo

 Oesía é unha consultora tecnolóxica con máis 700 postos de traballo na Coruña; e que presta servizos ao Concello da Coruña

A Marea Atlántica presentou onte no Pleno do Concello da Coruña un rogo oral, instando ao goberno a recibir á representación sindical do Grupo Oesía na Coruña, que están a denunciar as malas condicións de traballo nesta empresa tecnolóxica e a negativa da dirección a negociar calquera tipo de mellora.

Segundo o concelleiro, Alberto Lema, que mantivo un encontro con representantes do cadro de persoal de Oesía, “outra vez estamos diante dunha compañía que opera nun sector decisivo coma o tecnolóxico, que obten grandes beneficios pero que recunca na precarización e nunhas condicións de traballo abusivas”. 

Nesta xuntanza quedou patente o malestar da plantilla, que denuncia o incumprimento sistemático das condicións de teletraballo, do plan de igualdade e doutros dereitos laborais. “A actitude de Oesía é inaceptable, máis aínda cando presta os seus servizos ao concello da Coruña mediante un contrato que dá emprego a 25 persoas” conclúe Lema.

Plantilla de 3.200 persoas, 700 na Coruña

A empresa de consultoría tecnolóxica Oesía conta cunha plantilla de 3,200 traballadores e traballadoras en todo o Estado, das que 700 están na cidade da Coruña. A situación do seu cadro de personal pon de manifesto a realidade de precarización laboral e subemprego nun sector, o da información e a telecomunicación, que é a estratéxico no futuro económico da nosa cidade e comarca, pero que non debería medrar ao prezo de recortar dereitos laborais. Unha precarización especialmente grave no caso desta empresa, que pecha ano tras ano con grandes beneficios económicos.