O Goberno da Marea Atlántica non participará na Ofrenda do Antigo Reino ao Santísimo que se celebra en Lugo este domingo

Xulio Ferreiro, que con toda seguridade será investido alcalde o sábado, remarca o seu respecto por calquera tipo de credo, como o católico, e por suposto as boas relacións entre as cidades da Coruña e Lugo; pero cumprirá coa defensa do laicismo que incluía o programa electoral da Marea Atlántica

O goberno da Marea Atlántica cumprirá co seu programa electoral e manterá a laicidade das institucións públicas, polo que o próximo domingo 14 de xuño o alcalde da Coruña Xulio Ferreiro (que será investido con total seguridade o día antes) evitará participar da Ofrenda ao Santísimo do Antigo Reino de Galicia, á que adoitaba acudir o rexedor coruñés -ao igual que os e as das sete antigas capitais de provincia galegas- nun acto católico que inclúe unha procesión baixo palio e unha ofrenda que resultan contrarias ao principio de neutralidade relixiosa que defende a Marea Atlántica. Deste xeito, Xulio Ferreiro non acudirá á Ofrenda ao Santísimo do Antigo Reino de Galicia, se ben quere deixar claro o seu “respecto ás persoas crentes e, por suposto, á cidade de Lugo e os seus habitantes e institucións municipais”.

No programa electoral da Marea incluía o compromiso de “respectar a laicidade da institución Municipal, de acordo ao principio de neutralidade relixiosa. O Concello da Coruña, en canto administración pública, e os cargos da Marea, en canto representantes públicos da cidadanía, axustarán a súa práctica ao principio de neutralidade ideolóxica e relixiosa, garantindo a súa independencia e a efectiva aplicación do principio do laicismo”.