A Coruña e Barcelona, primeiros concellos pola despatoloxización trans. Únense á campaña internacional para reclamar que sexa retirada da clasificación de enfermidades da OMS

Como sociedade, temos que facer o posible porque se produza un cambio de mentalidades profundo que permita que a diversidade e o dereito ao propio corpo sexan algo real

Coincidindo co Día Internacional de Acción pola Despatoloxización Trans, que se celebrou o  24 de outubro, os concellos da Coruña e Barcelona asinaron o Manifesto da Rede Internacional STP (Stop Trans Pathologization), iniciativa que pretende que se retire a transexualidade da Clasificación Internacional de Enfermidades da OMS. A campaña, que arrinca no ano 2012 desde unha rede internacional de entidades e colectivos, pretende incidir no marco de políticas en materia de saúde para cambiar a perspectiva médica e legal que xestiona a identidade sexual e de xénero.

A día de hoxe, a diagnose da denominada “disforia de xénero” é imprescindible se se quere acceder ás cirurxías ou tratamentos hormonais no estado español, pasando a ser decisión dun psiquiatra en troques de ser unha escolla persoal. Este feito é parte das violencias que as nosas sociedades infrinxen ás persoas transxénero e transexuais, que non poden decidir por si mesmas e teñen que se someter a unha sorte de xuízo médico para poder ter acceso ao cambio de identidade sexual desexado. Ademais, a necesidade de encaixar dentro dun código de xénero binario para non caer na marxinalidade é, moitas das veces, o que obriga a pasar por procesos de reasignación sexual. Isto pode entenderse mais como consecuencia dunha patoloxía social que como unha enfermidade da persoa trans.

Este enfoque afecta tamén ás persoas intersexuais, que son sometidas a tratamentos de “normalización binaria” para encaixar nun dos dous sexos aceptados como “normais” pola cultura hexemónica, a maior parte das veces sendo menores e sen ser plenamente conscientes do proceso. A institución médica considera a necesidade da mutilación xenital e de agresivos tratamentos hormonais cando o individuo intersexual aínda acaba de nacer.

Na maior parte dos casos, a falta de información das familias deixa a decisión en mans da ciencia, que cataloga sistematicamente estes casos coma “enfermos”. Esta patoloxización de corpos sans responde a unha lóxica binarista que invisibiliza e maltrata aos individuos que non encaixan nas limitadas categorías de home e muller, definicións identitarias da orde cultural dominante que deixan fora calquera outra realidade. As cirurxías e tratamentos, xustificados para paliar posibles consecuencias psicolóxicas, poden provocar serios problemas de saúde que, de seren aceptados como son, nunca terían que afrontar.

Somos responsables como sociedade facer o posible porque se produza un cambio de mentalidades profundo que permita que a diversidade e o dereito ao propio corpo sexan algo real. A Concellería de Igualdade e Diversidade da Coruña comprométese a dar visibilidade e sensibilizar á cidadanía en torno a estas problemáticas, que non só afectan as persoas trans e intersexuais, senón á maneira na que entendemos a identidade sexual e de xénero como comunidade.