As alcaldías da comarca, convocadas por Xulio Ferreiro como rexedor da Coruña, trazaron naquel foro unha folla de ruta común en materia de medio ambiente, mobilidade, residuos, emprego, innovación e xestión integral do ciclo da auga

Tras dous anos de desinterese, é o momento de reactivar a axenda metropolitana e avanzar, con iniciativas concretas, nos grandes debates que van definir o noso futuro

 

A voceira da Marea Atlántica, María García, e o vicevoceiro, Iago Martínez, mantiveron hoxe un encontro coa alcaldesa de Bergondo, Alejandra Pérez, dentro da rolda de xuntanzas que están a celebrar cos concellos da área metropolitana da Coruña. “Como fixemos estes días con Sada, Oleiros e Cambre, quixemos escoitar á rexedora de Bergondo e trasladarlle o firme compromiso do noso grupo coa reactivación do proxecto metropolitano da Coruña, cuestión que formará parte das conversas que imos iniciar co PSOE en María Pita”, resume García.

A mobilidade foi un dos eixes deste encontro, sendo a falta de alternativas de transporte público un problema que afecta a Bergondo desde hai décadas, e ao que a Xunta non parece disposto a dar solución. Os problemas de acceso a un concello que, ademais, ten un dos focos de solo industrial da comarca, prexudican a todo o tecido metropolitano. Por iso volvemos insistir na necesidade de crear unha autoridade única de transporte, tal e como se reclamou desde a Mesa de Alcaldías en 2018, impulsada por Xulio Ferreiro.

Na xuntanza tamén se trataron outros retos que precisan, necesariamente, dunha perspectiva metropolitana, como é o caso do tratamento de residuos, sendo fundamental a defensa do modelo de Nostián, lastrada pola falta de interese do goberno da Coruña nos últimos anos, ou a xestión integral do ciclo da auga. No mandato da Marea Atlántica déuselle un impulso decidido á Área Metropolitana, pero nos dous últimos anos se está a abandonar o compromiso de redactar un anteproxecto de lei que trasladarlle ao Parlamento de Galicia, necesario para a creación deste organismo supramunicipal. É o momento de retomalo.

Máis alá da lei, como recordaron García e Martínez esta mañá, o proxecto metropolitano implica desafíos múltiples que precisan de canles permanentes de diálogo e traballo común dos diferentes concellos. Esas prioridades, e os instrumentos para abordalas, foron xa definidas en 2016 nos chamados Acordos de Mariñán, impulsados polo goberno da Marea Atlántica.