Pedímoslle que participe de xeito activo na posta en marcha do que pode ser un polo de innovación e emprego na Coruña

Apoiamos a proposta das startups locais para a creación dunha lanzadeira de empresas tecnolóxicas emerxentes vinculada aos terreos da antiga fábrica de armas

A Marea Atlántica rexistrou unha pregunta de resposta oral no vindeiro Pleno, o xoves 10 de marzo, para coñecer que xestións fixo o goberno local para promover a posta en marcha da da Cidade das TIC nos terreos da antiga fábrica de armas. “Estamos ante un proxecto que está chamado a converterse nun polo de emprego e innovación na Coruña, ante o que o Concello non pode permanecer pasivo ante unha oportunidade coma esta”, segundo sinala o concelleiro Alberto Lema.

Hai poucos días que o reitor da Univeridade da Coruña, Julio Abalde, anunciou que están xa moi próximas a adxudicarse as obras do que será o primeiro edificio da Cidade das TIC, o Centro de Servizos Avanzados. O proxecto avanza e o goberno local debería ter iniciativa á hora de definir os usos deste espazo e a súa integración na cidade. 

A Coruña concentra o 55% do emprego tecnolóxico en Galicia

Neste sentido, lembramos a proposta que están a promover unha vintena de startups coruñesas, para crear unha lanzadeira de empresas tecnolóxicas emerxentes, vinculada a Cidade das TIC, que facilite o emprendemento, cree emprego de calidade e reforce o papel da Coruña como referente do sector tecnolóxico en Galicia. 

Tras unha xuntanza cos impulsores do proxecto, desde a Marea Atlántica reiteramos o noso apoio á idea, que xa foi incorporada ao acordo que asinamos co PSOE para a aprobación dos Orzamentos 2022, dotada con 350.000 euros. Na nosa cidade operan xa con máis de 500 empresas vinculadas á tecnoloxía, que concentran 55% do emprego deste sector en Galicia, polo que unha lanzadeira deste tipo consolidaría o liderado.