Trátase dunha iniciativa sinxela de implementar, que facilitaría as persoas con TEA poidan ter acceso aos servizos municipais, construíndo unha cidade máis inclusiva

A Marea Atlántica levará ao Pleno do mes de xullo unha iniciativa para reclamar o uso de pictogramas como sinalización nos espazos municipais de atención ao público, para facilitarlle a vida ás persoas con trastornos do espectro autista (TEA). Para iso, buscaremos o apoio do conxunto da  Corporación e xa lle trasladamos esta iniciativa á Asociación Galega de Asperger (Asperga) nunha xuntanza esta semana. 

A concelleira Silvia Cameán sinala que “a instalación de pictogramas é unha medida sinxela e que o Concello podería aplicar sen custo algún, xa que a Xunta ten un programa para financiar este tipo de iniciativas. A cambio, teremos unha cidade con maior accesibilidade cognitiva, máis amable para toda a veciñanza”. 

As persoas con TEA adoitan ter maior dificultade para comprender e interpretar a linguaxe escrita, porque lles pode resultar complexo asociar ideas aos textos. Por iso, élles máis sinxelo para a súa vida cotiá o uso de pictogramas, imaxes cun significado único, a través do cal identifican a realidade que representa.

“Xa son moitas as cidades que están a empregar os pictogramas nos seus espazos públicos, eliminado barreiras de comunicación, e cremos que A Coruña debería ser unha delas”, engade Silvia Cameán. 

Unha cidade para todas as persoas

O uso de pictogramas é parte dos chamados Sistemas Aumentativos e Alternativos de Comunicación, formas de expresión que serven para aumentar e compensar as dificultades que moitas persoas non neurotípicas teñen coa linguaxe falada e escrita. Os pictogramas axúdanlles a comunicarse co mundo, e o seu uso estase a estender nas últimas décadas. Unha ferramenta sinxela e que garante o dereito a cidade para moitas das nosas veciñas, agora excluídas.