María Garcia: “A 1 de outubro, cando faltan 3 meses para rematar o ano, e sen unha soa chamada aos grupos da oposición, sen un intento de negociar, o PSOE renuncia a gobernar. É gravísimo” 

O goberno municipal da Coruña anunciou hoxe, por sorpresa e durante as preguntas orais do Pleno, que renuncia a aprobar a tempo uns Orzamentos 2021 para afrontar a crise sen precedentes que estamos a vivir e limitarase a prorrogar os do ano en vigor. Desde a Marea Atlántica consideramos que esta actitude é neglixente e irresponsable, que amosa a incapacidade do executivo local para facer o seu traballo, e que lle fará pagar un prezo moi alto á cidade da Coruña. 

Deste xeito, e por boca do portavoz do goberno, José Manuel Lage, deuse a coñecer hoxe que a 1 de outubro, cando faltan tres meses para rematar o ano, o equipo de Inés Rey considérase incapaz de elaborar un proxecto de orzamentos a tempo. Como sinalou a nosa voceira, María García, “deciden isto sen unha soa chamada nin unha soa conversa cos grupos da oposición. Estamos ante un goberno que renuncia a negociar, desbordado e incapaz de asumir as súas obrigas. Renuncia a impulsar novos proxectos, a renovar os convenios coas entidades sociais, a Renda Social Municipal, as bolsas comedor… Renuncia a gobernar. É gravisimo que o goberno renuncie a facer un orzamento para 2021. Amosa que o diálogo do que tanto se gabou este goberno é unha performance, unha farsa que empregan para ocultar a súa propia incapacidade”. 

Incumprimento dos acordos

María García reclamoulle ao goberno municipal que faga o seu traballo e non se escude na pandemia para saltarse as súas obrigas, porque é precisamente a crise que se está a despregar é o que esixe non fallarlle á veciñanza. E reclamoulle ao Partido Socialista que comece por “cumprir os acordos aos que chegou desde o inicio do mandato, eses que asina con moita présa e executa con moita desidia”. 

“A Marea Atlántica cumpriu a súa parte. Investimos á alcaldesa, aprobamos as ordenanzas fiscais e os Orzamentos 2020, e tamén o plan de choque fronte ao coronavirus. Quen non cumpriu foi o PSOE, seguimos agardando polo reforzo da axuda no fogar, pola bolsa de alugueiro social, polo servizo de lavandería para persoas maiores, pola empresa municipal de enerxía que axude a baixar a factura da luz… Tres cuartas partes deses acordos seguen sen cumprir, e hoxe decatámonis que non teñen intención de facelo”, reflexionou a nosa voceira. 

O baleiro nas políticas culturais

Finalmente, o viceportavoz da Marea Atlántica, Iago Martínez, preguntoulle ao goberno municipal como pensa corrixir 15 meses de parálise nas políticas culturais do Concello. A cuestión ía dirixida á alcaldesa, teórica nova responsable da área tras a última crise de goberno, pero Inés Rey evitou contestar, do mesmo xeito que evita comparecer nas comisión ou render contas da súa actividade. 

“Tras destituír fulminantemente ao responsable de Cultura, nunha emenda á totalidade da súa propia xestión, non percibimos moitos cambios. Non houbo ningunha análise, nin antes nin despois da pandemia, ningunha iniciativa destacable e ningún compromiso no cumprimento dos acordos coa Marea Atlántica, que nesta área están a cero”, sinalou Martínez. 

O concelleiro rematou cun chamamento a escoitar ao sector, que “ten boas ideas e disposición a colaborar. Non sexan sectarios e escoiten. Non agarden a que algunha persoa responsable dunha sala de concertos teña que poñerse en folga de fame como fixo Lolo Villaverde”.