Entre outras cuestións, non se ampliaron os recursos para vítimas de violencias machistas, non se introducen cláusulas de igualdade na contratación municipal, nin se convocou o Consello Municipal de Igualdade para facilitar a participación do movemento feminista
Reclamamos a convocatoria da Comisión de Seguimento prevista na ordenaza, que non se reuniu nin unha soa vez no que vai de mandato
A Ordenanza de Igualdade do Concello da Coruña, deseñada durante o mandato de Xulio Ferreiro, foi aprobada en Pleno o 3 de outubro de 2019, como parte dos acordos que asinaron a Marea Atlántica e o PSOE para facer posible a investidura de Inés Rey. Desde aquel día, en lugar de aproveitar unha normativa pioneira en materia de políticas feministas, o goberno municipal está a incumprila sistematicamente. Por iso, reclamamos que se convoque a Comisión de Seguimento prevista na ordenanza, para analizar os incumprimentos e a forma de corrixilos.
Entre as carencias máis graves, non se está a reforzar os recursos dispoñibles para atender ás vítimas de violencias machistas, con listas de agarda no CIM de ata dous meses.
Tampouco se están a ter en conta os fomento da igualdade de xenénero nas contratacións nin nas subvencións municipais. A ordenanza indica que aquelas empresas que acrediten medidas de conciliación e un esforzo para reducir a brecha entre homes e mulleres deberían ter mellores puntuacións nestas convocatorias.
En 19 meses de mandato non se fixo un só esforzo para levar a perspectiva de xénero a todas as áreas de goberno, non se elaborou un Plan de Igualdade nin se fixo ningún estudo da situación na cidade. Os programas de igualdade e prevención das violencias machistas foron tamén eliminados da oferta de Coruña Educa.
Longa lista de acordos incumpridos
Máis alá da Ordenanza de Igualdade, o PSOE acumula varios incumprimentos dos acordos asinados coa Marea Atlántica, ao comezo do mandato. Non se creou a Casa das Mulleres Marcela e Elisa para centralizar os servizos e recursos de Igualdade, pese a que o Orzamento ten fondos para redactar o proxecto. Como tampouco se aproveitaron os 50.000 euros para continuar coa Escola de Empoderamento Feminista, que no mandato anterior ofreceu formación e conferencias de figuras como Silvia Federicci.
Tamén quedou esquecida a creación do Observatorio de Igualdade na Coruña, desaproveitando 432.000 euros de fondos europeos FEDER conseguidos pola Marea Atlántica. E, en materia de conciliación segue pendente o novo contrato do Servizo de Axuda a Domicilio e o impulso dun programa de lavandería para persoas maiores. Está moi claro que a Igualdade non é prioritaria para o goberno de Inés Rey.