Saltar ao contido

Máis protección para as brañas da Coruña

Levamos á Deputación a iniciativa de Ecoloxistas en Acción elaborou un informe no que identifica numerosos destes espazos de enorme riqueza hídrica e biodiversidade, fundamentais para o planeta

Noutra moción conxunta, tamén demandamos que a Xunta lle retire a autorización das verteduras contaminantes da mina de San Finx, en Lousame

A Marea Atlántica defenderá este venres 24 de febreiro, no Pleno da Deputación da Coruña, unha moción para reclamar que as brañas da provincia da Coruña, importantísimas reservas hídricas e de biodiversidade, sexan incluídas no Catálogo de Humidais da Xunta de Galicia, tal e como sinala o informe técnico elaborado recentemente por Ecoloxistas en Acción. Tamén, nunha moción conxunta co BNG e o PSOE, reclamamos que se retire a autorización das verteduras contaminantes da mina de San Finx, en Lousame, nun río que desemboca na ría de Muros e Noia. Un erro gravísimo.

Deste xeito, procuraremos que a maioría dos grupos políticos apoien o compromiso da Deputación “na defensa, protección e conservación dos humidais, brañas e turbeiras” da provincia, e para darlle apoio económico a Ecoloxistas en Acción para que poidan seguir identificando e catalogando estes espazos naturais que o goberno galego ignora.

Nesta primeira pescuda, identifícanse as brañas do Deo, Valadares, do Monte Inxerio, da Calzada, do Espindro, do Torreiro, da Lagoa e Pedra Guinchada, da Lagoa e Vilarchán – Carboeiro, de Fulgueiro, da Serra e de Troitomil. Todas elas espazos sen ningún tipo de protección, a pesar de ser hábitats recoñecidos no Convenio Ramsar para a protección dos Humidais.

Ecoloxistas en Acción fai un traballo que debería asumir a Xunta

‘Brañas’, cadro do pintor Llorens que pode verse no Museo de Belas Artes da Coruña

Trasladamos esta iniciativa tras unha xuntanza mantida con representantes de Ecoloxistas en Acción nas últimas semanas, na que participaron o candidato á alcaldía da Coruña pola Marea Atlántica, Xan Xove, e o noso voceiro provincial, Alberto Lema, ademais da número 4 da candidatura, Chiqui García.

Neste encontro, puidemos coñecer de primeira man o informe de humidais da provincia da Coruña que elaborou o colectivo ecoloxista no marco da súa campaña Humidais para a vida. Un traballo excelente, que merece todo o recoñecemento e que debería estar a facer a propia Xunta de Galicia se tivese a mínima preocupación polo medio ambiente e a conservación do territorio.

Tal e como se ven de sinalar no Día Mundial dos Humidais, o pasado 2 de febreiro, estes hábitats son básicos para a supervivencia humana xa que son berces de diversidade biolóxica, fontes de auga e de produtividade primaria das innumerables especies vexetais e animais que os precisan para subsistir. Porén, a súa desaparición está sendo tres veces máis rápida que a dos bosques, sendo xa máis do 35% dos humidais do mundo os que se teñen degradado ou perdido dende 1970. En tempos de secas recorrentes e dunha crise climática innegable, protexer estes espazos é fundamental.

Verteduras en San Finx

Doutra banda, presentamos unha moción conxunta con PSOE e BNG para reclamar que a Xunta retire a autorización que lle concedeu o 1 de febreiro á empresa Tungsten San Finx SL, para verter máis de 600.000 m3/ano de augas residuais tóxicas da súa mina en Lousame ao río San Fins, tributario do río Traba, co consecuente impacto sobre a ría de Muros e Noia, os seus bancos de marisqueo e varios espazos da Rede Natura 2000.

É unha demanda impulsada pola Asociación Vida é Ría de Noia, e apoiada tamén pola Marea Cidadá de Noia, que denuncia a total irregularidade desta autorización, da que son responsables a Directora de Augas de Galicia, o Subdirector Xeral de Xestión do Dominio Público Hidráulico e a Xefa da Área de Vertidos. As verteduras de San Finx conteñen altísimas concentracións de cadmio, cobre e cinc, metais pesados que a empresa non é capaz de depurar.

Fronte a esta incomprensible agresión ambiental, reclamámoslle á Xunta de Galicia que retire a autorización, que cese ás persoas responsables de asinala, e que inicie a revisión de oficio do proxecto de explotación e do plan de restauración da mina de San Finx, aprobados en 2009 sen a obrigada avaliación de impacto ambiental.