Tres de cada catro medidas pactadas para permitir a investidura de Inés Rey seguen sen cumprirse 14 meses despois, e non hai sinais de mellora

A inmensa maioría dos proxectos introducidos pola Marea Atlántica nos Orzamentos 2020 seguen sen executarse


A Marea Atlántica vén de rexistrar unha batería de preguntas de resposta escrita para o Pleno deste xoves 10 de setembro, nas que lle reclama ao goberno municipal explicacións sobre o inaceptable grao de incumprimento dos acordos que permitiron a investidura de Inés Rey e a aprobación dos orzamentos e ordenanzas fiscais de 2020 no Concello da Coruña.

Deste xeito, preguntarémoslle ao grupo de goberno por que está a “incumprir sistematicamente os acordos coa Marea Atlántica” asinados para executar o primeiro ano de mandato. Como denunciamos xa en maio, tres de cada catro puntos do acordo de investidura seguen sen cumprirse. Chegado setembro non hai indicios de mellora malia que a maioría eran liñas de traballo xa iniciadas e avanzadas durante o pasado mandato.

Neste listado inclúense cuestións como crear un operador enerxético 100% municipal, a redución das tarifas de bus para maiores de 65 e menores de 25 anos, a creación dunha bolsa pública de alugueiro, conservar os Orzamentos Participativos ou a procura dunha solución para a veciñanza de San Vicenzo de Elviña. 

Incumprimentos e transfuguismo

O balance do acordado para os orzamentos non é mellor. Das 123 medidas que a Marea Atlántica introduciu nas contas  municipais, a inmensa maioría segue pendente, e polo menos 45 foron incumpridas de xeito deliberado. Entre elas, a mellora do saneamento ao seu paso pola depuradora de Bens para evitar a entrada de auga salgada, o mantemento dos concursos públicos para financiar proxectos culturais e unha parte significativa das obras nos barrios. 

A situación non é boa, e o xiro á dereita que o PSOE vén de realizar coa incorporación dunha concelleira tránsfuga procedente de Ciudadanos, apartándose do que votou a cidadanía en 2019, non invita ao optimismo. Semella que o Partido Socialista da Coruña está máis cómodo afastándose do bloque progresista que lle deu a Alcaldía hai quince meses.