Pedímoslle ao PSOE que non volva converter o Ofimático nun problema”, declara María García tras reunirse cun cooperativista encadeado hoxe na ponte da Vedra para defender o seu dereito á vivenda

Lembramos, tamén, que o concelleiro de Urbanismo ten pendente convocar á Mesa de Traballo para resolver a situación de San Vicente de Elviña, tal e como pactamos hai seis meses

A Marea Atlántica pídelle ao goberno municipal que axilice a concesión de licenzas de primeira ocupación no parque Ofimático, despois de que a nosa voceira, María García, e o concelleiro Xiao Varela se reuniran hoxe cun veciño afectado, que se encadeou hoxe na pasarela da avenida da Vedra reclamando o dereito a acceder a súa vivenda, rematada desde hai un ano. E nin a Xunta nin o Concello da Coruña dan resposta as súas solicitudes.

“Pedímoslle ao PSOE que non volva converter o Ofimático nun problema, pois vemos que unha vez máis o goberno de Inés Rey nin atende as solicitudes de reunión nin descolga o teléfono ”, declarou María García, Engadiu que “Despois de 28 anos, tres PXOM, catro alcaldes e oito responsables de urbanismo, foi o goberno da Marea Atlántica o que lle puxo solución a esta desfeita herdada de Francisco Vázquez. Rematamos as obras de urbanización máis urxentes e concedemos as primeiras licenzas de ocupación. Agardamos que agora no se produza un regreso aos problemas do pasado”. 

Pola súa banda, Xiao Varela lembrou que a cooperativa A Carnocha, a primeira en ter lista toda a documentación, “recibiu a súa licenza de primeira ocupación 24h despois de contar con subministro eléctrico”. Despois chegarían outros tres edificios, xa habitados nestes momentos.  Unha xestión que contrasta coa falta de resposta do goberno municipal socialista a outras cooperativas.

Esiximos a convocatoria 

Porén, os problemas no Ofimático continúan tamén á outra beira da avenida da Vedra, onde a veciñanza de San Vicente de Elviña continúa a agardar por unha solución urbanística que lles permita manter as súas vivendas. O PSOE comprometeuse a resolver esta cuestión nos acordos que asinou coa Marea Atlántica en xuño do ano pasado, e que permitiron a investidura de Inés Rey. En decembro, ademais, pactamos a convocatoria dunha Mesa de Traballo, con presenza de todos os grupos da Corporación e da veciñanza afectada. Máis de seis meses despois, o concelleiro de Urbanismo, Juan Díaz Villoslada, continúa sen convocala.

Esixímoslle ao executivo local que cumpra a súa palabra e reúna canto antes esta Mesa de Traballo, que forma parte dese 75% de acordos incumpridos ao cabo dun ano de mandato. A nosa man continúa tendida para buscar solucións, pero o PSOE ten que rectificar e comezar a respectar as súas promesas.