O executivo local xa aplicou un recorte de 700.000 euros no IMCE, pero aínda non puxo en marcha ningunha das medidas para o sector cultural incluídas no plan contra crise da COVID19. A Marea Atlántica urxe ao goberno municipal a sacar adiante o Bono Cultural prometido hai mes e medio

Iago Martínez: “As medidas previstas son insuficientes, como xa denunciamos, pero son mellores que o que hai agora: un severo recorte no orzamento cultural”

A Marea Atlántica urxe ao goberno municipal a poñer en marcha o Bono Cultural e o resto de medidas para a cultura incluídas no plan do Concello da Coruña fronte á crise da COVID19. “As medidas previstas, xa o dixemos, son insuficientes para un sector que está a levar o peor da crise, pero son mellores que o que hai agora: un recorte de 700.000 euros no IMCE e nada máis”, asegura o noso vicevoceiro, Iago Martínez. 

O goberno ten os fondos dispoñibles desde o 4 de xuño, e un acordo unánime para empregalos en paliar a situación de emerxencia social e económica na que nos atopamos. Tardou máis dun mes en poñer en marcha a liña de axudas para autónomos e pemes, que por sorte xa se poden ir solicitando. Pero que non beneficiará á maioría de persoas que traballan no sector cultural, dada a precariedade e estacionalidade que o caracteriza. E aínda non se fixo realidade ningunha das medidas específicas para o sector da Cultura, unha actividade económica con centos de empregos na Coruña. O que si se aplicou xa foi un severo recorte ao orzamento cultural do Concello.

Desde a Marea Atlántica puxemos sobre a mesa, en repetidas ocasións, unha batería de propostas para converter A Coruña nun porto refuxio para a Cultura, pero como lembra Iago Martínez, “a maioría foron sistematicamente ignoradas, a pesar de desenvolverse tras escoitar aos colectivos profesionais, algo que o goberno aínda non fixo”. “Polo menos, insistimos en que se poñan en marcha as medidas que xa levan seis semanas aprobadas, pois para moitas traballadores e traballadoras da cultura xa é tarde”, engadiu o concelleiro.

Por outra parte, e a marxe das axudas específicas para a crise da COVID, o Consello Reitor do IMCE celebrado esta mañá aprobou, coa nosa abstención, a autorización de gasto para a convocatoria de contratacións, que incumpre o acordo de Orzamentos, como xa denunciamos, ao suplantar as liñas de axudas Xerminal e Cultura de Barrio.

“Foi unha convocatoria improvisada, cunhas bases moi pobres que provocaron confusión no sector e que tiveron que ser rectificadas ao pouco de publicarse. Pediremos acceso ao expediente para coñecer os criterios polos que se seleccionaron as propostas”, explicou Iago Martínez. 

Museo Arte Contemporáneo de Naturgy Na Coruña

Un futuro para o MAC

Doutra banda, instamos ao goberno municipal a recuperar as xestións para recuperar o Museo de Arte Contemporánea da Coruña (MAC) ou impulsar unha alternativa que encha o seu oco. O MAC era moito máis ca unha colección de obras, era un foco de actividade, formación, recursos para a creación artística e divulgación cultural, algo que non debe nin esquecerse nin perderse.

O goberno de Xulio Ferreiro deixou unha proposta desenvolvida: unha fundación con colaboración privada pero liderado público, no que as institucións colaborasen coas principais empresas da cidade para manter o museo, cun compromiso de 500.000 euros anuais desde o Concello. Lamentablemente, semella que o PSOE mantena enterrada nun caixón.

Por iso, trasladámoslle todo o noso apoio ao persoal do antigo MAC, e rexistramos xa unha batería de preguntas ao goberno municipal para coñecer o alcance da súa falta de iniciativa.