O nivel de execución orzamentaria global sitúase no 29,6% logo de case sete meses e sería moi grave que, nun momento de crise, o gasto público non cumprise a súa función 

“Estes datos constrastan cos anuncios constantes de melloras en contratación e obra pública. A propaganda do goberno vai por diante da realidade”, di Iago Martinez

A Marea Atlántica critica a baixísima execución do Orzamento 2020 por parte do goberno municipal que, cando está a piques de rematar o mes de xullo, sitúase no 29,6% global e no 4,3% dentro do previsto para investimentos (capítulos VI e VII). “Nun momento no que a cidade precisa de todos os recursos para facerlle fronte á crise que temos enriba, o Concello da Coruña deixa sen gastar os seus fondos”, sinalou o noso vicevoceiro, Iago Martínez, que hoxe participou na Comisión de Facenda. “Instamos ao goberno municipal a mudar o rumbo e poñerse a traballar. Sería moi grave que o ano rematase cunha baixa execución”. 

Os datos contrastan coa febre propagandística do executivo local, que non para de anunciar os seus datos de obra pública ou plans de contratación de millóns de euros, pero non está a ser capaz de levar á práctica os investimentos previstos para 2020. “A realidade é teimuda. O orzamento non se executa mentres Inés Rey triplica o gasto en publicidade con respecto ao mandato de Xulio Ferreiro, superando os 1,3 millóns de euros. A propanganda vai por diante da realidade”, engadiu Martínez. 

O certo é que, máis alá da situación de emerxencia sanitaria, xa o ano pasado a execución do Orzamento foi baixa: un 78,5%, cinco puntos menos que a rexistrada pola Marea Atlántica en 2015. Son as consecuencias de ter un goberno municipal no que a maioría das áreas non están a facer o seu traballo. “Como chave da gobernabilidade, démoslle ao goberno todas as facilidades durante este primeiro ano, pero non o están a aproveitar”.

Onde están os contratos menores do segundo trimestre?

Cómpre lembrar, ademais, que o exectutivo do PSOE ten aínda sen publicar os datos de contratos menores do segundo trimestre de 2020, e tememos que continúe a tendencia no abuso desta figura, a máis opaca de todas as previstas pola lei, xa que se asinan sen concurso público. 

No primeiro trimestre de 2020, último periodo do que se dispón de información, o goberno municipal subscribiu 677 contratos menores por un importe total de 1,73 millóns de euros, o que supón un incremento do 13,4% no gasto con respecto ao mesmo periodo de 2019. O importe medio destas contratacións tamén medrou substancialmente, dende os 1.880,90 euros do último periodo de goberno da Marea Atlántica até os 2.565,70 actuais, é dicir un 36,4% máis.