María García: “A xente pídenos un acordo, e nós traballamos para conseguilo desde o primeiro día. Non somos partidarias de cheques en branco, pero si de poñer o Concello ao servizo da veciñanza”

Este plan permitirá permitirá reforzar os servizos sociais, mellorar o servizo de canguraxe, crear axudas para autónomos e pemes, apoiar á cultura ou implantar bonos para fomentar o consumo local, entre outras medidas

A voceira municipal da Marea Atlántica, María García, participou hoxe na presentación do Plan de Choque Social do Concello da Coruña, acordado por todos os grupos da Corporación e dotado con 13 millóns de euros. García sinalou que “celebramos hoxe o primeiro paso de medidas inéditas de rescate social, para conter o impacto dun virus que se levou demasiadas vidas por diante”, pero engadiu que “o problema é que non chegue antes, pois levamos 75 días de estado de alarma, de mobilidade limitada e parón económico, 75 días de esforzo e sacrificio por parte de moitas persoas, de solidariedade cidadá e redes de axuda”.

Neses dous meses e medio, a Marea Atlántica tendeulle a man ao acordo e fixo máis dun cento de propostas, varias delas incluídas no acordo final. Axudamos a deseñar este primeiro paquete de medidas, que non debe ser o último, “destínase a darlle osíxeno aos fogares e negocios locais que o precisan con urxencia. A xente pídenos un acordo, e nós traballamos para conseguilo desde o primeiro día”. Así, este Plan de Choque permitirá reforzar os servizos sociais, mellorar o servizo de canguraxe, crear axudas para autónomos e pemes, apoiar á cultura ou implantar bonos para fomentar o consumo local, entre outras moitas medidas.

Ten carencias e problemas, por exemplo, “a aposta podería ter sido maior prescindindo de gastos non prioritarios, como o millón de euros destinado a propaganda”, detallou María García, pero é positivo no seu conxunto e contará co voto da Marea Atlántica

Queda por diante a tramitación do modificativo de crédito orzamentario que sostén este Plan de Choque Social, que se realizará pola vía exprés e debería rematar a vindeira semana. Con todo, os atrasos chegaron ata o mesmo día de hoxe, xa que o expediente definitivo non lle foi remitido aos grupos ata 10 minutos antes do inicio da presentación pública.

Xusto é recoñecer que, mesmo con esta demora, as medidas do Concello da Coruña “chegan antes que as da Xunta de Galicia que, pese a ter maiores competencias e orzamento, aínda non fixo nada máis que soster a campaña permanente de Alberto Núñez Feijóo”, afirmou María García.

Finalmente, a nosa portavoz insistiu en que “o Plan de Choque Social terá o noso voto favorable, pois que haxa disenso non quere dicir que non poida haber acordo e na Marea Atlántica témolo claro: non somos partidarias de cheques en branco, pero si de poñer o Concello ao servizo da xente”.

Medidas impulsadas pola Marea Atlántica 

  • O reforzo dos servizos sociais, cunha maior dotación para a Renda Social Municipal e as axudas de emerxencia.
  • O incremento de fondos para o servizo de canguraxe, abordando a dificultade de moitos fogares para conciliar a vida persoal, laboral e familiar mentres as esclas estean pechadas.
  • Creación dunha Bolsa de Alugueiro Social, xa prevista nos nosos acordos co PSOE para o inicio do mandato.
  • Creación de bonos para fomentar o consumo no comercio local.
  • Bolsa de baixos e locais comerciais en alugueiro.
  • Maior apoio ao sector cultural, buscando alternativas aos grandes eventos e fomentando as residencias artístas.
  • Creación dunha Oficina de Atención Cidadá para centralizar a xestión de todas as medidas deste Plan de Choque Social.
  • Reforzo do persoal municipal, para tramitar as axudas o máis rápido posible.
  • E, parcialmente, incentivos para autónomos, pemes e micropemes.

Carencias do Plan de Choque Social

  • Botamos en falta maiores esforzos en políticas de vivenda para facer fronte á crise habitacional de moitas familias que non poden pagar o alugueiro. Avisamos da problemática que se aveciña cando remate o estado de alarma e con el a moratoria nos desafiuzamentos.
  • Tras o esforzo realizado no aloxamento temporal de Riazor, parécennos insuficientes as medidas para abordar o senfogarismo. Faltan solucións como o reforzo do programa Housing First.
  • Se ben se reforza o servizo de canguraxe, non se inclúen outros servizos de conciliación, como son o programa dos patios escolares abertos ao barrio ou actividades específicas para adolescentes.
  • As axudas a autónomos, pemes e micropemes se quedan curtas e botamos en falta axudas directas á contratación de persoas desempregadas.
  • Elimínanse investimentos escollidos pola cidadanía a través dos Orzamentos Participativos, sobre todo novas zonas verdes.
  • En vez de recortar en propaganda, duplícanse os fondos ata un millón de euros. Este plan de choque non pode ser un artefacto publicitario.
  • Do mesmo xeito, non parece lóxico solapar o contrato de limpeza en contra do posicionamento maioritario do Pleno desta corporación, malgastando niso 600.000 euros.