Concello

Parque de San pedro

Prorroga dos contratos públicos: Unha práctica normal

Xunto co goberno, o PP perdeu a memoria.Xa non lembra, ou non quere lembrar, que cando remata un contrato público, é normal continuar pagando vía factura os servizos, ata que se pode renovar.

O Concello da Coruña terá que facelo durante uns meses, como se anuncia con grandes titulares, co servizo de bibliotecas –pola complexidade dos trámites da remunicipalización– e co mantemento de parques e xardíns –onde o PP deixara un concurso cheo de irregularidades e que non valoraba a calidade do servizo–. Obviamente, non por chegar a fin os contratos vanse deixar de coidar os xardíns, nin van pechar as bibliotecas.

Non é tan raro. O Partido Popular fíxoo en varias ocasións durante o seu mandato en María Pita, aínda que agora perdese a memoria:

  • En novembro de 2011 rematou o contrato de mantemento dos semáforos, e estivo se renovarse ata marzo de 2014. Durante eses dous anos e medio, o Concello seguiu pagando o servizo con facturas con reparos. 90.000 euros ao mes. Un total de 2,4 millóns.
  • En abril de 2012 rematou o contrato do mantemento da paxareira de San Diego, e non se renovou ata 2013. Todo ese tempo pagáronse as facturas con reparo, por uns 5.900 euros ao mes
  • En xullo de 2012 rematou o contrato de mantemento de instalacións deportivas, que non se renovou ata novembro dese ano. As facturas, con reparos, seguiron chegando nos meses intermedios, e foron pagándose.

O PP fai esforzos por perder a memoria

Quere esquecer a súa verdadeira relación cos contratos públicos: a corrupción, o financiamento ilegal, os enchufes e o pago de favores. Na Coruña seguen abertos uns cantos sumarios da Pikachu, a operación Pokemon percorre o norte de Galicia e a Patos o sur. Todas elas teñen en común que as o costume do Partido Popular de empregar as institucións como axencias de colocación. E no Estado temos a Gürtel, a Taula, a Púnica…

O partido que leva décadas facendo un uso privado dos cartos públicos tenta agora inventar problemas nos gobernos do cambio. Os seus non hai que inventalos. Están nos xulgados.

Have your say