Novas da Marea

Roteiro peiraos

O domingo, Gañemos o Porto

Este domingo, a Marea Atlántica organiza o roteiro Gañemos o Porto para reivindicar o uso e titularidade pública dos peiraos interiores

O percorrido está aberto á cidadanía e partirá ás 19.00 da Autoridade Portuaria, para explicar as posibles consecuencias da venta dos peiraos de Calvo Sotelo, Batería e San Diego

Contará coa participación do alcalde, Xulio Ferreiro; do concelleiro de Rexeneración Urbana, Xiao Varela; e da concelleira de Medio Ambiente, María García

 
O vindeiro domingo 30 de abril, a Marea Atlántica organizará un roteiro polas beiras do Porto da Coruña, para explicar cales poden ser as consecuencias do planeamento urbanístico vixente nos peiraos interiores. No acto, participarán o alcalde, Xulio Ferreiro, o concelleiro de Rexeneración Urbana, Xiao Varela, e a concelleira de Medio Ambiente, María García, xunto a técnicos do Concello e cidadanía mobilizada.

A actividade foi presentada hoxe en rolda de prensa por Mercedes Bolaño e Álex Sánchez, da Marea Atlántica. Co nome de Gañemos o Porto, o percorrido comezará ás 19.00 horas, diante da Autoridade Portuaria da Coruña, e percorrerá o litoral ata rematar no Xardín de San Carlos. Será unha camiñada festiva para falar da oportunidade que se abre no noso porto. E da loita que será necesaria para non perdela. Terá paradas fronte ao Palexco, as galerías da Mariña e o peirao do Leste, con olladas ao pasado e ao futuro destas zonas.

 

A herdanza do convenio de 2004

Álex Sánchez lembrou que “non está lonxe o día en que boa parte da actividade portuaria se trasladará a Punta Langosteira. Ese día, centos de milleiros de metros cadrados en primeira liña de costa, nos peiraos de Calvo Sotelo, Batería e San Diego quedarán libres”. Será unha oportunidade para gañar espazo público, para achegar a cidade ao mar e aproveitar a súa riqueza. Pero as opcións políticas que gobernaron antes a cidade tiñan outras visións, e diso queremos falar o domingo, ollando cara o que nos xogamos.

Coa escusa de financiar o Porto Exterior, Francisco Vázquez, Alberto Núñez Feijóo, Francisco Álvarez Cascos e o daquela alcalde de Arteixo, Manuel Pose, asinaron un convenio que pretendía “pagar” a obra de Punta Langosteira coa venda dos peiraos interiores da Coruña.

“É moi discutible que unha obra do Estado teña que pagarse a costa do litoral da nosa cidade. E máis discutible aínda que realmente sirvan para costear esta obra. O Porto Exterior vai preto de custar 1.000 millóns. E a Autoridade Portuaria conta con sacar 25 millóns da venda”, engadiu Sánchez.

Rolda presna Gañemos o Porto

 

Un modelo xa incorporado ao planeamento urbanístico

Neste sentido, Mercedes Bolaño explicou que “este convenio de 2004 xa foi incorporado ao PXOM da Coruña por gobernos anteriores, e dun xeito que permite a especulación inmobiliaria. En canto a Autoridade Portuaria decida, pode comezar a venda dos peiraos. E quen se faga con estes terreos terá para si a oportunidade de enriquecerse co que debería ser de toda a veciñanza”.

Hai que lembrar que o PXOM, unha vez se desafecten os terreos portuarios, permitirá construír hoteis, centros comerciais e outros negocios de uso terciario nos peiraos de Batería e Calvo Sotelo, en edificios de ata nove alturas. E en San Diego será posible a construción dunhas 4.000 vivendas de ata 10 alturas.

“Desde a Marea Atlántica defendemos o uso público e a xestión pública dos peiraos. E manter a titularidade pública dos terreos. Defendemos outras alternativas para o porto: zonas verdes, espazos comúns e actividades que aproveiten a riqueza do mar en lugar de enterrala baixo a economía do ladrillo”, argumentou Bolaño.

 

Apoio á manifestación do 7 de maio

O goberno municipal está a negociar para defender a xestión pública e o uso público destes terreos, para que o porto siga a ser porto e non se transforme en urbanización de luxo. Pero a última palabra tena o Goberno do Estado a través do Ministerio de Fomento.

Non hai tanto que o porto da Coruña era de libre acceso. Un día, pechárono cun valado. Outro, o Palexco e o centro comercial medraron para agochar de novo o mar. Agora, corremos o risco de repetir o erro, pero multiplicado por mil Pero aínda estamos a tempo de impedilo. Coa mobilización xa se conseguiu parar a venda da Solana e o Hotel Finisterre. É tempo agora de abrir o debate e decidir o que queremos para o porto, en común con toda a veciñanza, e con todas as forzas políticas que penden no ben común.

Por iso, queremos facer tamén un chamamento a acudir á manifestación convocada pola Comisión Aberta en Defensa do Común, para o vindeiro 7 de maio. Porque queremos que o porto siga a ser un porto, non unha urbanización de luxo.

Have your say