Concello

C9nw3nmWAAEd9jN.jpg large

O Entroido contra as paixóns tristes

O concelleiro de Culturas, José Manuel Sande,  foi declarar ao xulgado por mor dun dos carteis de promoción do Entroido da Coruña, e estivo arroupado por unhas 200 persoas

“Se cómpren batallas culturais, por suposto, imos libralas coa forza da razón”, declarou Sande

 

O Entroido, en pé contra as paixóns tristes. O concelleiro de Culturas, José Manuel Sande, tivo que ir declarar ao xulgado por unha anécdota. Pero una anécdota que amosa a involución das liberdades en todo o Estado.  Foi como investigado por un dos cartaces do Entroido coruñés, que presuntamente ofende sentimentos relixiosos. E con el foron unhas 200 persoas que quixeron apoiar a liberdade de expresión, o dereito á irreverencia e o sentido do humor.

Vídeo de Galiza Contrainfo

 

O concelleiro prestou declaración durante 20 minutos, e explicoulle á xúiza “todo o proceso de contratación do recoñecido artista local, Alberto Guitián, encargado da elaboración e deseño dos carteis”. “O que deixamos claro, como xa fixemos outras moitas veces, e que neste cartel non houbo ningún ánimo de ofensa. Trátase dun cartel inserido dentro da irreverencia que ten, tradicionalmente, a festa do Entroido. Estamos, ao cabo, ante unha contribución artística máis dun creador local”, considerou Sande.

 

Mobilización en defensa das liberdades

jesuisTamén agradeceu a presenza cidadá na porta do xulgado, e argumentou que “vendo a ameaza que, a escala estatal, está habendo sobre certas liberdades, faise necesario involucrármonos e comprometernos. É necesario mobilizarse. Estamos vivindo un clima que permite a intromisión en determinadas liberdades que son ‘sagradas’; se cómpren batallas culturais, por suposto, imos libralas coa forza da razón”.

“O que quixemos deixar claro, como sempre fixemos até o de agora, é que este goberno local non ten ningún tipo de espírito ‘anticlerical’ ou de ofensa, o único que defende é a necesaria separación das institucións públicas e os estamentos da igrexa”, recordou. E subliñou que o
Goberno coruñés “sempre foi respectuoso coas distintas crenzas e desde o primeiro día se axustou ao cumprimento da Constitución, no que ten que ver coa necesaria separación do carácter confesional, cousa que, por certo, non aconteceu con outros gobernos”.

 

Have your say